afmæli og tannréttingar

Jæja, það er helst í fréttum að Remí varð átta ára i vikunni. Orðin svaka stór strákur og fékk nýja skó númer 33 í hálfa afmælisgjöf.

Hann bauð helstu vinum sínum á veitingastaðinn Quick um síðustu helgi og getiði séð myndir úr afmælinu hér að neðan. Það var náttúrulega svakafjör og allir kófsveittir eins og vanalega og þess vegna nenna foreldrarnir ekki að sjá um þessi afmæli lengur því það fer allt gjörsamlega á hvolf og allir verða æstir. Það er kanski ljótt að segja það en á Quick tekur þetta bara einn á hálfan tíma, allir fá það sem þeim þykir best, jummí jummí mat, og svo fara allir mettir og þreyttir heim með glaðning í poka. 

Annars er hann voðalega uppveðraður því hann fékk að prófa að fara í Taekvondo tíma. Þetta er einhver asísk bardagaíþrótt og nú kemst ekkert annað að. Svo í næstu viku er frí í skólanum og hann fer á tennisnámskeið og sv byrjar boltinn aftur eftir viku svo það er nóg að gera hjá honum. Við erum að reyna að fá Leu til að fara í Taekvondo, en hún vill ekkert gera. Bara vera á msn-inu, teikna og með vinkonum og vinum.

Lea breyttist í Ugly Betty á föstudaginn var og fékk spangir. Hana vantaði víst eina fullorðinstönn í neðri góm svo að það varð að rífa eina fína og flotta úr efrigóm líka og setja járnarusl á þetta allt saman og strekkja. Greyjið er með stöðugan verk í gómunum og svo sár þar sem járin særa holdið. En þetta er víst bara svona fyrstu dagana.

Nú er nú komið nokkuð úrval í spangirnar og alls konar litir í boði, meira að segja glært. En hún Lea mín vildi bara blessað stálið sem hylur allar litlu hvítu tennurnar hennar og það verður svo næsta eina og hálfa árið.

En annars er mér sagt að tannleysi sé ættgengt og könnumst við William ekkert við neitt svoleiðis hjá alla vega nánustu ættingjum og lýsi ég því eftir þeim sem veit kanski betur en ég (bara svona upp á gamnið til að sanna eða afsanna kenninguna).

Þó að uppbótarsjúkratryggingin mín sjái til þess að við komum ekki til með að borga evru af þessum tannréttingum, þá er ég farin að sjá að það verður nokkur kostnaður af þessu alla vega tannkremskostnaður og burstakostnaður, því allt festist í járnunum og ekki þolir hún það og því er hún alltaf rokin inn á bað til að bursta.

 Set inn myndir af henni Ugly Betty næst. Hún hefur ekki enn náðst á filmu og svo er hún rokin í eitthvert vinkvennastúss og gisterí.

      

Athugasemdir

[Dagbjört (IP-tala skráð) 20.4.2008 kl. 22:03]

Sæl Systir

Til hamingju með soninn. Ég er nú ljóta frænkan, man ekki eftir neinum 

afmælisdögum. Bið kærlega að heilsa Remi og kysstu hann þúsund kossa 

frá mér kannski fær hann eitthvað skemmtilegra frá okkur seinna. Ég kannast ekki

við neitt tannleysi í okkar ætt allavega svona það sem stendur manni næst, 

annars er ég viss um að það er ekki svo langt síða að íslendingar fóru að láta

telja í sér tennurnar svo forfeður okkar geta hafa vantað nokkra án þess að gera 

veður út af því eða vitað af því. Allir biðja að heilsa. Kær kveðja  Dagbjört

[Kristín (IP-tala skráð) 20.4.2008 kl. 22:36]

Hæ Björg og familí. Til hamingju með hann Remí stóra! Kristján Bjartur notar skó númer 21. Hann fór á róló í dag með fötu og skóflu - alsæll. Kveðjur frá Safamýrargengi